नेपाली राष्ट्रिय पुरुष फुटबल टोलीका मुख्य प्रशिक्षक म्याट रसले आफ्नो पदबाट राजिनामा दिएका छन्।
उनको राजिनामाबारे अखिल नेपाल फुटबल संघ (एन्फा) का महासचिव किरन राईले पनि आधिकारिक रूपमा पुष्टि गरेका छन्।

४७ वर्षका अष्ट्रेलियन प्रशिक्षक रसले गत फागुन महिनामा मात्रै राष्ट्रिय टोलीको प्रशिक्षकको जिम्मेवारी सम्हालेका थिए।
तत्कालीन पूर्व इटालियन प्रशिक्षक भिन्सेन्जो अल्बर्टो एनेसको स्थानमा आएका उनले नेपाललाई खासै उल्लेखनीय सफलता दिलाउन सकेनन्।

सूत्रका अनुसार, रसले आफ्नो नेतृत्वमा नेपाली टोलीले अपेक्षाकृत प्रदर्शन गर्न नसकेको कारण नैतिक जिम्मेवारीका आधारमा राजिनामा दिएको हुनसक्ने बताइएको छ।
उनको राजिनामासँगै हाल राष्ट्रिय टोलीको मुख्य प्रशिक्षकको पद रिक्त बनेको छ।

आगामी नोभेम्बर १८ मा हुने एएफसी एसियन कप छनोटअन्तर्गत नेपालले मलेसियासँग प्रतिस्पर्धा गर्ने कार्यक्रम रहेको छ।
सम्भवत उक्त खेलका लागि एन्फाले अन्तरिम प्रशिक्षक नियुक्त गर्नेछ, जसमा नेपाली प्रशिक्षक नै हुने सम्भावना प्रबल रहेको बताइन्छ।

---